Hatim Ali Mehr
ba-khuda hain teri hindu but mai-khvar ankhen
nashshe ki dori nahin pahnen hain zunnar ankhen
nazr-e-dil mangti hain aap ki sarshar ankhen
ain masti men raha karti hain hoshiyar ankhen
mujh ko nazzara hai is parda-nashin ka manzur
kaash ban jaaen miri rauzan-e-divar ankhen
chashm-e-ahu se gharaz thi na mujhe nargis se
tiri ankhon se jo miltin na ye do-char ankhen
char-chashm is liye kahta hai mujhe ik aalam
ki miri ankhon men phirti hain tiri yaar ankhen
dekhte rahte hain ham raah tumhari sahab
aap aate nahin aa jaati hain har baar ankhen
shokh-chashmi se chakaron ko vo dhamkati hain
dekhna ham se milana na khabar-dar ankhen
taak lete hain nazar-baz hain ham bhi sahab
dil churaya hai churate ho jo har baar ankhen
pyaar se main ne jo dekha to vo farmate hain
dekhiye dekhiye hoti hain gunahgar ankhen
chuum lete hain vo aine men ankhen apni
lab masihai karenge ki hain bimar ankhen
chashm-e-baddur hai kajal bhi to manzur-e-nazar
kyuun nazar ho gai kyuun ho gaiin bimar ankhen
rukh-e-sayyad jo dekha hai to ab dekh ke gul
band kar lete hain murghan-e-giraftar ankhen
ban gae panja-e-mizhgan bhi miri dast-e-dua
dekh rakhti hain na kuchh hasrat-e-didar ankhen
dast-e-vahshat men ghazalon ko taka karta huun
rat-din pesh-e-nazar hain tiri ai yaar ankhen
ye mira daman-e-tar daman-e-gulchin hoga
rang laengi abhi to miri khun-bar ankhen
murgh-e-dil us se kisi tarah nahin bach sakta
kahin shahin shikari si hain tayyar ankhen
chashm-e-makhmur men saaqi ki ye kaifiyyat hai
nashsha maston ke do-bala hon jo hon char-ankhen
chahiye hazrat-e-musa ke liye jalva-e-tur
tere didar ki hain apni saza-var ankhen
agara chhut gaya ‘mehr’ to chunnar men bhi
dhundha karti hain vahi kucha-o-bazar ankhen
Leave a Reply