azaab TuuTe dilon ko har ik nafas guzra
shikasta-pa the garan muzhda-e-jaras guzra
hujum-e-jalva-o-nairangi-e-tamanna se
tamam mausam-e-gul mausam-e-havas guzra
ajab nahin ki hayat-e-davam bhi baḳhshe
vo ek lamha-e-furqat jo ik baras guzra
ye maslahat ki kahin dahr hai kahin firdaus
vahi jo alam-e-dil ham pe ham-nafas guzra
gham-e-ma.al raha arz-e-shauq se pahle
is ek baat pe kya kya na pesh-o-pas guzra
kashakash-e-gham-e-azadi-o-asiri men
har ashiyan pe koi alam-e-qafas guzra
rah-e-talab men hain dar-manda rahbar ‘tabish’
yahi hai haal to ye qafila bhi bas guzra
Leave a Reply