aur mai-khana-nashin chor banae na gae
ham dhare jaate hain nahaq kahin aae na gae
shokhiyan teri uthaengi mujhe bazm se kya
un se to sharm ke parde bhi uthae na gae
qaid naghme ki hui qaid-e-qafas par turra
ham se sayyad ko naale bhi sunae na gae
parda Daala tiri rahmat ne mire isyan par
un farishton se mire aib chhupae na gae
kaun sa lutf na firdaus men paaya lekin
phir bhi duniya ke mire dil se bhulae na gae
jab chale su-e-lahad mud ke na dekha ghar ko
aise ruthe ki kisi se bhi manae na gae
ye samajh kar ki gunahgar hain kis malik ke
na gae hashr men ham aankh jhukae na gae
ghair ke jalne se kuchh aanch na aati tum par
kyuun alag baithe hue aag lagae na gae
na raha hashr men nazzare se mahrum koi
qabr se ek hamen aaj uthae na gae
kis ne dekha hamen kuche men hasinon ke ‘riyaz’
muft badnam hue ham kahin aae na gae