Poet
auqat-e-shaiḳh go ki sujud o qayam hai
mere kane to ek ḳhuda hi ka naam hai
har sub.h uTh buton se mujhe raam raam hai
zahid tiri namaz ko mera salam hai
teri nigah ke daur men aisa hua huun mast
saghar se mujh ko aankh milana haram hai
ham aur teri shikayaten zalim ḳhuda se Dar
bohtan hai ghalat hai ye mahz ittiham hai
din ko na bhuuk hai na mujhe raat ko hai niind
is rozgar men ye miri sub.h o shaam hai
marta huun aa ke dekh tire intizar men
varna sunega ab koi dam ko tamam hai
qasid kahan chala hai mujhe bhi ḳhabar to de
yak dam tu baiTh ja ki mujhe tujh se kaam hai
tujh ko qasam ḳhuda ki jo jaata hai us taraf
tu bhuliyo na itna hi mera payam hai
kahiyo miri taraf se na pahuncha mira javab
itna dimagh kya tira ‘hatim’ ghulam hai
qasid se us ne sun ke haqiqat kaha ki vaah
kya ḳhuub is suḳhan ka koi ye maqam hai
kahna use yahi tu ki ai bul-havas hanuz
ashiq hua to par ye tira ishq ḳhaam hai
ma.ashuq ki janab men koi bhi be-adab
bola hai is tarah se jo tera kalam hai
Leave a Reply