aql se hasil hui kya kya pashimani mujhe
ishq jab dene laga talim-e-nadani mujhe
ranj degi bagh-e-rizvan ki tan-asani mujhe
yaad aaega tira lutf-e-sitam-rani mujhe
meri janib hai mukhatib khaas kar vo chashm-e-naz
ab to karni hi padegi dil ki qurbani mujhe
dekh le ab kahin aa kar jo vo ghaflat-shiar
kis qadar ho jaae mar jaane men asani mujhe
be-naqab aane ko hain maqtal men vo be-shak magar
dekhne kaahe ko degi meri hairani mujhe
sainkadon azadiyan is qaid par ‘hasrat’ nisar
jis ke baais kahte hain sab un ka zindani mujhe
Leave a Reply