apni ankhon ke samundar men utar jaane de
tera mujrim huun mujhe Duub ke mar jaane de
ai na.e dost main samjhunga tujhe bhi apna
pahle maazi ka koi zaḳhm to bhar jaane de
zaḳhm kitne tiri chahat se mile hain mujh ko
sochta huun ki kahun tujh se magar jaane de
aag duniya ki laga.i hui bujh ja.egi
koi aansu mire daman pe bikhar jaane de
saath chalna hai to phir chhoḌ de saari duniya
chal na paa.e to mujhe lauT ke ghar jaane de
zindagi main ne ise kaise piroya tha na soch
haar TuuTa hai to moti bhi bikhar jaane de
in andheron se hi suraj kabhi niklega ‘nazir’
raat ke saa.e zara aur nikhar jaane de
Leave a Reply