apne purkhon ki rivayat se haTta hua main
zindagi tere sabhi rangon se kaTta hua main
had-e-idrak se aage hai rasa.i lekin
apne andar kisi markaz pe simaTta hua main
hai mohabbat ḳhas-o-ḳhashak-e-mulaqat ka naam
aag ban ke kisi paikar se lipaTta hua main
kaise la-yani iradon ki chubhan hai mujh men
kaisi avazon pe har lamha palaTta hua main
koi vahshi hai miri zaat men pinhan har shab
ik darinde ki tarah us pe jhapaTta hua main
zindagi razm-gah-e-sud-o-ziyan hai ‘anjum’
ek bebas ki tarah us se nimaTta hua main
Leave a Reply