apne man men jhank kar bhi ḳhud se begana raha
tu haqiqat ashna ho kar bhi divana raha
ruḳh agarche janib-e-ka.aba raha hai shaiḳh ka
dil magar yad-e-butan se ik pari-ḳhana raha
sang-e-asvad ko diya bosa to dil kahne laga
ka.aba-o-qibla se kitni duur but-ḳhana raha
ek din pi kar zara sach kah diya tha umr bhar
shakl se bezar meri pir-e-mai-ḳhana raha
ishq ne baḳhshi hai vo shohrat ‘naresh’ ik umr tak
bachche bachche ki zaban par mera afsana raha
Leave a Reply