Meer Hasan
gul hai zakhmi bahar ke hathon
dil hai sad-chak yaar ke hathon
dam-ba-dam qata hoti jaati hai
umr lail-o-nahar ke hathon
jan-ba-lab ho raha huun misl-e-habab
main tire intizar ke hathon
ek dam bhi mila na ham ko qarar
is dil-e-be-qarar ke hathon
apni sar-gashtagi kabhi na gai
gardish-e-rozgar ke hathon
ik shagufa uthe hai roz naya
is dil-e-dagh-dar ke hathon
dil pe kya kya hue hain naqsh-o-nigar
navak-e-dil-figar ke hathon
ho raha hai kharab khana-e-dil
dida-e-ashk-bar ke hathon
gar kabhi lag gaya tira daman
meri musht-e-ghubar ke hathon
chhutna hai phir us ka amr-e-muhal
is tire khaksar ke hathon
ik dil khaar khaar huun main ‘hasan’
apne us gul-ezar ke hathon
Leave a Reply