apne ahval pe ham aap the hairan baaba
aankh dariya thi magar dil tha bayaban baaba
ye vo aansu hain jo andar ki taraf girte hain
hon bhi to ham nazar aate nahin giryan baaba
is qadar sadma hai kyuun ek dil-e-viran par
shahr ke shahr yahan ho ga.e viran baaba
ye shab o roz ke hangamon se sahme hue log
rahte hain mauj-e-saba se bhi hirasan baaba
unchi divaron se bahar nikal aa.e to khula
ham ne sinon men bana rakkhe hain zindan baaba
ḳhush-guman ho ke na baiTh in dar-o-divar se puchh
ahl-e-ḳhana bhi hain kuchh roz ke mehman baaba
yaḳh havaon se mujhe aati hai ḳhush-bu-e-bahar
shola-e-gul ki amiin hai ye zamistan baaba
gard-bad aa.en ki girdab, bayaban ho ki bahr
zindagi hoti hai ap-apni nigahban baaba
ga.i rut lauT bhi aati hai ‘ziya’ hausla rakh
ham ne dekhi hain siyah shaḳhon pe kaliyan baaba
Leave a Reply