andaz kisi ka hai sada aur kisi ki
hai choT koi aur dava aur kisi ki
tabdil-shuda shaḳhs nazar aane laga vo
tevar men saja kar ke ada aur kisi ki
ik shoḳh se sairab nazar hone lagi hai
qabiz hai magar dil pe haya aur kisi ki
rahta tha gurezan jo sada meri vafa se
DhunDe hai vahi aaj vafa aur kisi ki
ḳhamosh faza thame raha vo mire haq men
main le ke chala aaya dua aur kisi ki
tufan men chaman apne pareshan to bahut tha
asuda nahin pa ke saba aur kisi ki
likha hi nahin jurm mire naam ke aage
huun pa ke bahut ḳhush main saza aur kisi ki
hai ḳhuub daraḳhshan sa na.e shahr men aa kar
chipka ke badan par vo ziya aur kisi ki
ai ‘sahni’ kyuun aisa hua mujh ko batana
raushan hai tire ghar men faza aur kisi ki
Leave a Reply