aks-e-khushbu huun bikharne se na roke koi
aur bikhar jaun to mujh ko na samete koi
kaanp uthti huun main ye soch ke tanhai men
mere chehre pe tira naam na padh le koi
jis tarah khvab mire ho gae reza reza
us tarah se na kabhi tuut ke bikhre koi
main to us din se hirasan huun ki jab hukm mile
khushk phulon ko kitabon men na rakkhe koi
ab to is raah se vo shakhs guzarta bhi nahin
ab kis ummid pe darvaze se jhanke koi
koi aahat koi avaz koi chaap nahin
dil ki galiyan badi sunsan hain aae koi