surKH Makan Dhalta Jata Hai Ek Barfili miTTi Mein

Sajjad Baluch

surḳh makan Dhalta jaata hai ik barfili miTTi men

aur makin bhi dekh rahe hain ye tabdili miTTi men

un galiyon ke ramz-o-kinaya yuun vahshat-asar hue

men to dil hi chhoḌ ke bhaga is lachkili miTTi men

ḳhamyaza hai bam-o-dar par jaane kin barsaton ka

nam-dida pul ghuum rahe hain har sau siili miTTi men

ik sahra men rone vaale pahle TuuT ke rote hain

aur dua.en bo aate hain phir us giili miTTi men

kal ji bhar kar zahr unDela ham ne ḳhvab ki faslon par

har su niili ghaas ugi hai ab zahrili miTTi men

ab shadab ye hogi ja kar jaane kitne ashkon se

jaane kitna ḳhuun milega aur is piili miTTi men