Ajib Rang the Dil Mein Jo Aansuon Mein Na The

Tauseef Tabassum

ajiib rang the dil men jo ansuon men na the

pas-e-mizha the vo chehre ki chilmanon men na the

jo ro chuke to yahi bolte dar-o-divar

hue ḳhamosh ki jaise kabhi gharon men na the

hamari vaz.a ne pabandiyan qubul na kiin

misal-e-nashsha the ham aur sagharon men na the

chale to apni hi raftar se ulajh ke gire

hava ki tarah muqayyad jo faslon men na the

chaman men rah ke vo kanTe chubho liye ham ne

ki itne rang to shayad yahan gulon men na the

fana ka ḳhauf tha mahmez chalne valon ka

ye hausle kabhi TuuTe hue paron men na the

baḌa aziim musavvir tha Dubta suraj

shafaq ke rang magar bujhte rauzanon men na the