ajab rang ki mai-parasti rahi
ki be mai piye mai ki masti rahi
bikharte rahe gesu-e-ambarin
saba un se mil mil ke basti rahi
raha daur men saghar-e-nargisi
miri mai un ankhon ki masti rahi
vo shakl apni har dam badalte rahe
yahan mashq-e-surat-parasti rahi
vahin rah pade raah men husn-e-dost
jahan husn valon ki basti rahi
mili roz ham faqa-maston ko mai
khuda jaane mahngi ki sasti rahi
‘mubarak’ parastar-e-mai-khana tha
ye jab tak raha mai-parasti rahi