karobar-e-shauq men bas faeda itna hua
tujh se milna tha ki main kuchh aur bhi tanha hua
koi palkon se utarti raat ko roke zara
shaam ki dahliz par ik saaya hai sahma hua
munjamid hoti chali jaati hain avazen tamam
ek sannata hai saare shahar men phaila hua
asmanon par likhi tahrir dhundli ho gai
ab koi masraf nahin ankhon ka ye achchha hua
is hatheli men bahut si dastaken ru-posh hain
us gali ke mod par ik ghar tha kal tak kya hua
Leave a Reply