Shahnaz Parveen Sahar
ajab hua ki mujhe maut se hayat hui
jab us ki zaat men tahlil meri zaat hui
har ek lafz sitare men ho gaya tabdil
tamam raat miri asman se baat hui
saja diye the munDeron pe be-qarar charagh
darun-e-rat mujhe aur ek raat hui
hari ruton men hamen shaḳh shaḳh dekhna tum
vo phuul phuul khila main bhi paat paat hui
main saanp siḌhi se patal tak gira.i ga.i
main jaan hi na saki jiit thi ki maat hui
tavil uḌaan ne madum kar diya hai vajud
main be-sabat thi kuchh aur be-sabat hui
tamam hone na hone ki sa.aton men ‘sahar’
vo ek shakl mujhe puuri ka.enat hui
Leave a Reply