Aise Bhi Kuchh Lamhe Yaro Aaenge

aise bhī kuchh lamhe yaaro ā.eñge

ham mashkūk nazar se dekhe jā.eñge

nīñd-bharī āñkheñ bhī dhoka detī haiñ

jāgoge to ḳhvāb kahāñ se ā.eñge

un se parda-dārī ghar meñ mushkil hai

fursat ke lamhe haiñ aa.eñ jā.eñge

dhuul huā jaatā hai manzar rātoñ kā

ḳhvāboñ kā me.aar kahāñ se lā.eñge

sannāTā āvāra phirtā hai ghar meñ

ham us ko ab kaam dilā kar jā.eñge

mandir masjid gurūdvāre sab shashdar haiñ

ab raste ke patthar puuje jā.eñge

dhuup meñ baiThe señk rahe ho apnā badan

ye bhī manzar ab uryāñ kahlā.eñge

sūraj chhat se utar gayā to kyā ġham hai

andhiyāre meñ ‘rind’ kahīñ so jā.eñge

Leave a Comment