Ahl-E-Tufan Aao Dil-Walon Ka Afsana Kahen

ahl-e-tufan aao dil-valon ka afsana kahen

mauj ko gesu bhanvar ko chashm-e-janana kahen

daar par chadh kar lagaen nara-e-zulf-e-sanam

sab hamen ba-hosh samjhen chahe divana kahen

yar-e-nukta-dan kidhar hai phir chalen us ke huzur

zindagi ko dil kahen aur dil ko nazrana kahen

thamen us but ki kalai aur kahen is ko junun

chuum len munh aur ise andaz-e-rindana kahen

surkhi-e-mai kam thi main ne chhu liye saaqi ke hont

sar jhuka hai jo bhi ab arbab-e-mai-khana kahen

tishnagi hi tishnagi hai kis ko kahiye mai-kada

lab hi lab ham ne to dekhe kis ko paimana kahen

para-e-dil hai vatan ki sarzamin mushkil ye hai

shahr ko viran ya is dil ko virana kahen

ai rukh-e-zeba bata de aur abhi ham kab talak

tirgi ko sham-e-tanhai ko parvana kahen

aarzu hi rah gai ‘majruh’ kahte ham kabhi

ik ghazal aisi jise tasvir-e-janana kahen

Leave a Comment