Karta Main Ab Kisi Se Koi Iltimas Kya

Poet

karta main ab kisi se koi iltimas kya

marne ka gham nahin hai to jiine ki aas kya

jab tujh ko mujh se duur hi rahna pasand hai

saa.e ki tarah rahta hai phir as-pas kya

tujh se bichhaḌ ke ham to yahi sochte rahe

ye gardish-e-hayat na aa.egi raas kya

ab tark-e-dosti hi taqaza hai vaqt ka

tera qayas gar hai yahi to qayas kya

maana ki tera milna hai mushkil bahut magar

har lamha TuuT jaa.e ab aisi bhi aas kya

ik umr ho ga.i hai yahi sochte hue

apni kitab-e-zist ka hai iqtibas kya

‘nadir’ kahin to sair ko bahar bhi ja.iye

har-dam kisi ki yaad men rahna udaas kya