dekha hai ik nazar unhen anjam jo bhi ho
qismat men apni ai dil-e-nakam jo bhi ho
meri nazar pe saara zamana hai mo’tariz
lekin vo ik ada hai lab-e-bam jo bhi ho
imkan phir riha.i ki karta hai koshishen
murgh-e-bala-nasib tah-e-dam jo bhi ho
kuchh in-o-an ko daḳhl nahin rah-e-ishq men
ab un ka mere vaste paigham jo bhi ho
ankhon men vaqt-e-did kuchh aansu zarur the
ham par ab is ke vaste ilzam jo bhi ho
kahta hai dil ki baat magar apne sher men
qismat ka maara ‘asi’-e-gumnam jo bhi ho
Leave a Reply