tire dard se jis ko nisbat nahin hai
vo rahat musibat hai rahat nahin hai
junun-e-mohabbat ka divana huun main
mire sar men sauda-e-hikmat nahin hai
tire gham ki duniya men ai jan-e-alam
koi ruuh mahrum-e-rahat nahin hai
mujhe garm-e-nazzara dekha to hans kar
vo bole ki is ki ijazat nahin hai
jhuki hai tire bar-e-irfan se gardan
hamen sar uThane ki fursat nahin hai
ye hai un ke ik ru-e-rangin ka partav
bahar-e-tilism-e-latafat nahin hai
tire sarfaroshon men hai kaun aisa
jise dil se shauq-e-shahadat nahin hai
taghaful ka shikva karun un se kyunkar
vo kah denge tu be-muravvat nahin hai
vo kahte hain shoḳhi se ham dilruba hain
hamen dil navazi ki aadat nahin hai
shahidan-e-gham hain subuk ruuh kya kya
ki us dil pe bar-e-nadamat nahin hai
namuna hai takmil-e-husn-e-suḳhan ka
guhar bari-e-taba-e-hasrat nahin hai
Leave a Reply