Ai Junun Tera Abhi Tak Na Muqaddar Badla

Shayar Jamali

ai junun tera abhi tak na muqaddar badla

shahr badla na kisi haath ka patthar badla

zindagi baḳhsh di jab qatl mujhe kar na saka

mere qatil ne bahut tez ye ḳhanjar badla

ho ga.i rah-e-junun phir kisi sazish ka shikar

mujh ko lagta hai har ik miil ka patthar badla

main to samjha tha yahan fan ki parastish hogi

chand sikkon ka uchhalna tha ki manzar badla

vo agar raah men khulta to koi baat bhi thi

haa.e afsos ki manzil pe pahunch kar badla

baat to jab thi ki tum ḳhud ko badalte yaaro

aaj tak tum ne har ik moḌ pe rahbar badla

mere daman men to ḳhvabon ke siva kuchh bhi na tha

vo jo badla to bahut soch-samajh kar badla

rang-o-ahang kali phuul parinde bhanvre

rut badalte hi har ik shaḳh ka manzar badla