Ai Junun Tera Abhi Tak Na Muqaddar Badla

ai junūñ terā abhī tak na muqaddar badlā

shahr badlā na kisī haath kā patthar badlā

zindagī baḳhsh dī jab qatl mujhe kar na sakā

mere qātil ne bahut tez ye ḳhanjar badlā

ho ga.ī rāh-e-junūñ phir kisī sāzish kā shikār

mujh ko lagtā hai har ik miil kā patthar badlā

maiñ to samjhā thā yahāñ fan kī parastish hogī

chand sikkoñ kā uchhalnā thā ki manzar badlā

vo agar raah meñ khultā to koī baat bhī thī

haa.e afsos ki manzil pe pahuñch kar badlā

baat to jab thī ki tum ḳhud ko badalte yaaro

aaj tak tum ne har ik moḌ pe rahbar badlā

mere dāman meñ to ḳhvāboñ ke sivā kuchh bhī na thā

vo jo badlā to bahut soch-samajh kar badlā

rang-o-āhang kalī phuul parinde bhañvre

rut badalte hī har ik shāḳh kā manzar badlā

Leave a Comment