ai but jo shab-e-hijr men dil thaam na lete
kalma men bhi hota to tira naam na lete
zid par agar aa jaaen ham ai rashk-e-masiha
mar jaate magar munh se tira naam na lete
kamil koi milta jo kharidar-e-dil-o-jan
ye jins yunhi bechte ham daam na lete
kyuun hashr men divana hamen kah ke pukara
nafrat thi to ab bhi vo mira naam na lete
vahshat-kada-e-dahr men chalta jo bas apna
dushman se mohabbat ke siva kaam na lete
jarob-kashi milti agar karb-o-bala ki
hathon se ‘munir’ aur koi kaam na lete