Haris Bilal
ai bagule ke libade men sama.i hui ret
saath rakh le mujhe ai vajd men aa.i hui ret
taaki suraj qarin aa.e to ye sahra ho jaa.e
sau samundar tale us ne hai bicha.i hui ret
baiThe baiThe mujhe chauraha bana deti hai
chaar samton se miri samt uḌaa.i hui ret
sham-e-bina.i munDeron ka safar karti rahi
dil uḌata raha ankhon men basa.i hui ret
ghar ki buniyad men aram nahin karti hai
ai mire dost ye Tilon se uTha.i hui ret
har chamakta hua zarra hai sitara ‘haris’
asman hai mire qadmon men bicha.i hui ret
Leave a Reply