ahl-e-mohabbat ki majburi baḌhti jaati hai
miTTi se gulab ki duuri baḌhti jaati hai
mehrabon se mahal-sara tak Dheron-Dher charagh
jalte jaate hain be-nuri baḌhti jaati hai
karobar men ab ke ḳhasara aur tarah ka hai
kaam nahin baḌhta mazduri baḌhti jaati hai
jaise jaise jism tashaffi paata jaata hai
vaise vaise qalb se duuri baḌhti jaati hai
girya-e-nim-shabi ki ne.amat jab se bahal hui
har lahza ummid-e-huzuri baḌhti jaati hai
Leave a Reply