Maktab Ki Aashiqi Bhi tariKH-E-Zindagi Thi

maktab kī āshiqī bhī tārīḳh-e-zindagī thī

fāzil thā ghar se majnūñ lailā paḌhī likhī thī

farhād jaan degā shīrīñ tabāh hogī

ye to ḳhudā ke ghar se goyā kahī badī thī

qudrat ke dā.ere meñ us vaqt but bane the

jab ne.amat-e-takallum taqsīm ho chukī thī

ka.abe meñ ham ne jā ke kuchh aur haal dekhā

jab but-kade meñ pahuñche sūrat hī dūsrī thī

mātam meñ mere ‘muztar’ vo kis adā se aayā

āñkhoñ meñ kuchh namī thī hoñToñ pe kuchh hañsī thī

Leave a Comment