Aftab Shamsi
sabhi bichhad gae mujh se guzarte pal ki tarah
main gir chuka huun kisi khvab ke mahal ki tarah
navah-e-jism men rota-karahta din-rat
mujhe darata hai koi miri ajal ki tarah
ye shahr hai yahan apni hi justuju men log
milenge chalte hue chiyuntiyon ke dal ki tarah
main us se milta raha aaj ki tavaqqo par
vo mujh se duur raha aane vaale kal ki tarah
nagar men zehn ke phir shaam se hai sannata
udaas udaas hai dil ‘mir’ ki ghazal ki tarah
nidhal dekh ke bistar men niind ki pariyan
phir aaj mujh se khafa ho gai hain kal ki tarah
Leave a Reply