in ki nazron men na ban jaa.e tamasha chehra
is liye Darta huun dikhlane se apna chehra
jaane kya baat hui shahr-e-nigar-e-jan men
aaj kyuun ajnabi lagta hai shanasa chehra
bahr-e-gham bhi hai kabhi ashiq ḳhasta ke liye
hai kabhi sahil-e-ishrat bhi tumhara chehra
ham vahan hain jahan qaa.em hai hukumat dil ki
phir bhi kyuun roz dikhata hai karishma chehra
chehra-e-husn ko ab dekh ke ye sochta huun
aa.ina hai koi ya a.ina-ḳhana chehra
kya rahe dil ki koi baat muamma ban kar
karta rahta hai yahan dil ka fasana chehra
kaun hai jis ke liye itna pareshan hai dil
DhunDhta rahta hai ab kis ko vo chehra chehra
kushta-e-gardish-e-dauran hue uf ri taqdir
varna kal chand se behtar tha hamara chehra
vo tire phuul se din mujh ko bahut yaad aa.e
main ne dekha jo tira dhuup men jhulsa chehra
chashm-e-mushtaq za-sar ta-ba-qadam main bhi huun
ban gaya hai jo tira husn sarapa chehra
mehrban kaun mire dil pe hai itna ai ‘zafar’
har ghaḌi rahta hai ankhon men ye kis ka chehra
Leave a Reply