Mushafi Ghulam Hamdani
ahl-e-dil gar jahan se uthta hai
ik jahan jism o jaan se uthta hai
chalo ai ham-raho ghanimat hai
jo qadam is jahan se uthta hai
jamaa rakhte nahin, nahin maalum
kharch apna kahan se uthta hai
gar naqab us ke munh se utthi nahin
shor kyuun karvan se uthta hai
vaae be-taqati o be-sabri
parda jab darmiyan se uthta hai
phir vahin gir pade hai parvana
gar tuk ik shama-dan se uthta hai
qissa-e-‘mushafi’ suna kar yaar
ishq is dastan se uthta hai
Leave a Reply