agar vo ḳhud hi bichhaḌ jaane ki dua karega
to us se baḌh ke mire saath koi kya karega
suna hai aaj vo marham pe choT rakkhega
mujhi se mujh ko bhulane ka mashvara karega
taras rahi hain ye ankhen us ek manzar ko
jahan se lauT ke aane ka dukh hua karega
agar ye phuul hai meri bala se murjhae
agar ye zaḳhm hai malik use hara karega
main janti huun ki jitna ḳhafa bhi ho jaae
vo mere shahr men aaya to rabta karega
main us se aur mohabbat se pesh a.ungi
jo mere haq men koi ‘aisha’ bura karega
Leave a Reply