Nazeer Nazar
agar vo hadisa phir se hua to
main tere ishq men phir paḌ gaya to
ki us ka ruThna bhi lazmi hai
mana lunga agar hoga ḳhafa to
miri uljhan sulajhti ja rahi hai
dikhaya hai tumhi ne rasta to
yaqinan raz-e-dil main khol dunga
diya apna jo us ne vasta to
chalo kuchh der ro len saath mil kar
koi lamha ḳhushi ka mil gaya to
tujhe mahfuz kar luun zehn-o-dil men
mila hai tu kahin phir kho gaya to
naya rishta nibhane ki talab men
agar TuuTa purana rabta to
kaleje se laga kar rakhte ham bhi
hamen vo raaz apne saunpta to
‘nazar’ tum zindagi samjhe ho jis ko
faqat paani ka ho vo bulbula to
Leave a Reply