Afzal Ahmad Syed
vo zindagi ko darate hain
maut ko rishvat dete hain
aur us ki aankh par patti bandh dete hain
vo hamen tohfe men khanjar bhejte hain
aur ummid rakhte hain
ham khud ko halak kar lenge
vo chidiya-ghar men
sher ke pinjre ki jaali ko kamzor rakhte hain
aur jab ham vahan sair karne jaate hain
us din vo sher ka ratib band kar dete hain
jab chand tuuta phuta nahin hota
vo hamen ek jazire ki sair ko bulate hain
jahan na maare jaane ki zamanat ka kaghaz
vo kashti men idhar udhar kar dete hain
agar unhen malum ho jaae
vo achchhe qatil nahin
to vo kanpne lagen
aur un ki naukariyan chhin jaaen
vo hamare maare jaane ka khvab dekhte hain
aur tabir ki kitabon ko jala dete hain
vo hamare naam ki qabr khodte hain
aur us men luut ka maal chhupa dete hain
agar unhen malum bhi ho jaae
ki hamen kaise maara ja sakta hai
phir bhi vo hamen nahin maar sakte
Leave a Reply