Suhaib Farooqui
agar sajdon men soz-e-dil nahin hai
ibadat ka koi hasil nahin hai
bhaTakne se bhi kuchh hasil nahin hai
safar ki jab koi manzil nahin hai
zaban-e-hal se kahti hain lashen
mohabbat ka koi qaa.il nahin hai
asar jis par na ho ah-o-fughan ka
vo sach-much pyaar ke qabil nahin hai
yaqinan vo yahin hoga kahin par
mira dil gum-shuda file nahin hai
miri ankhen hain maazi ka havala
mire ḳhvabon men mustaqbil nahin hai
hamare daur men shayad vafa bhi
nisab-e-ishq men daḳhil nahin hai
koi ifrit guzra hai idhar se
yahan lashen to hain qatil nahin hai
gareban chaak hai yaan har kisi ka
mah-e-kamil bhi ab kamil nahin hai
koi aaya nahin mujh ko bachane
mujhe lagta hai ye sahil nahin hai
jise tardid karne ki ho aadat
vo qaa.il ho ke bhi qaa.il nahin hai
kisi par to yaqin karna paḌega
yahan har shaḳhs to batil nahin hai
‘suhaib’ is bevafa ka kya karen ham
hamara dil hamara dil nahin hai
Leave a Reply