hamesha zulm ke manzar hamen dikhae gae
pahad tode gae aur mahal banae gae
tulu-e-subh ki afvah itni aam hui
ki nisf shab ko gharon ke diye bujhae gae
ab ek baar to qudrat javab-dah thahre
hazar baar ham insan azmae gae
falak ka tantana bhi tuut kar zamin pe gira
sutun ek gharaunde ke jab girae gae
tiri khudai men shamil agar nasheb bhi hain
to phir kalim sar-e-tur kyuun bulae gae
ye asman the ki aine the khalaon men
mah-o-nujum men jhanka to ham hi paae gae
daraz-e-shab men koi apna ham-safar hi na tha
magar ‘nadim’ sadaen to ham lagae gae
Leave a Reply