Bekhud Dehlvi
adu ko dekh ke jab vo idhar ko dekhte hain
nazar chara ke ham un ki nazar ko dekhte hain
vo rakh ke haath se a.ina tan ke baiTh ga.e
dahan ko dekh chuke ab kamar ko dekhte hain
kisi ke husn se ye ham ko bad-gumani hai
ki pahle naama se ham nama-bar ko dekhte hain
ye imtihan-e-kashish husn-o-ishq ka hai bana
na ham udhar ko na ab vo idhar ko dekhte hain
kabhi vo a.ine men dekhte hain apni shakl
kabhi vo ‘beḳhud’-e-ashufta-sar ko dekhte hain
Leave a Reply