Dr Azam
hai nigahon men koh-e-tur miyan
main nahin huun ḳhuda se duur miyan
vo bhi taqrir kar rahe hain jinhen
bolne ka nahin shu.ur miyan
le na Duube tiri ibadat ko
zohd-o-taqva ka ye ghurur miyan
mere munh men nahin zaban aisi
bolti jo hai ji-huzur miyan
rah ke dilli men bhi ye lagta hai
ab bhi dilli bahut hai duur miyan
ek maqtal thi mahfil-e-yaran
ham hi zulmat ko samjhe nuur miyan
ḳhuub hain sajda-reziyan teri
nafs par bhi to ho ubuur miyan
Leave a Reply