log kahte hain ki qatil ko masiha kahiye
kaise mumkin hai andheron ko ujala kahiye
chehre paḌhna to sabhi siikh ga.e hain lekin
kaisi tahzib hai apnon ko paraya kahiye
jaane pahchane hue chehre nazar aate hain
vaqt qatil hai yahan kis ko masiha kahiye
aap jis peḌ ke saa.e men khaḌe hain is ko
sehn-e-gulshan nahin jalta hua sahra kahiye
sab ke chehron pe hain aḳhlaq-o-muravvat ke naqab
kis ko apna yahan aur kis ko paraya kahiye
shab ke mathe pe koi saaya numudar hua
us ko ab pyaar ke angan ka savera kahiye
zahr-e-tanha.i-e-gham pi ke mohabbat men ‘ḳhayal’
kis tarah maut ko jiine ka sahara kahiye
Leave a Reply