ada-e-hairat-e-a.ina-gar bhi rakhte hain
hamen na chheḌ ki ab tak nazar bhi rakhte hain
na gird-o-pesh se is darja be-niyaz guzar
jo be-ḳhabar se hain sab ki ḳhabar bhi rakhte hain
kahan gaya tiri mahfil men zom-e-dida-varan
ye hausla to yahan kam-nazar bhi rakhte hain
qafas ko khol magar itna soch le sayyad
bahut asiir tere bal-o-par bhi rakhte hain
farishta hai to taqaddus tujhe mubarak ho
ham aadmi hain to aib-o-hunar bhi rakhte hain
ḳhusha-nasib ki divane hain to ham ai ‘dil’
kamal-e-nisbat-e-divana-gar bhi rakhte hain
Leave a Reply