Abhi Dekhi Kahan Hain Aapne Sab Khubiyan Meri

abhi dekhi kahan hain aap ne sab ḳhubiyan meri

nigahen DhunDhti hain aap ki bas ḳhamiyan meri

mira kirdar duniyan men shahadat se munavvar hai

nazar aaen falak par sab ko raushan surḳhiyan meri

vahan barson talak phulon ki kheti hoti rahti hai

baras jaati hain jin ḳhitton pe ja kar badliyan meri

main har neki ko apne dushmanon men baant deti huun

samar-avar raha karti hain is se nekiyan meri

zamana chahe jo samjhe ana ke saath zinda huun

tumhen bhi jiit legi ek din ye ḳhubiyan meri

kisi bhi maarke par ab talak haari nahin huun main

mira zevar raha hai doston ḳhuddariyan meri

jise tum raakh samjhe ho abhi tak aag hai us men

kuredo mat jala degi tumhen chingariyan meri

‘sabin’ aksar main dastarḳhavan se uth jaati huun bin khaae

kisi bhuke ke kaam aa jaaen shayad rotiyan meri

Leave a Comment