Shahzad Ahmad
ab na vo shor na vo shor machane vaale
ḳhaak se baiTh ga.e ḳhaak uḌane vaale
ye alag baat mayassar lab-e-goya na hua
dil men vo dhuum ki sunte hain zamane vaale
kisi manzil ki taraf koi qadam uTh na saka
apne hi paanv ki zanjir the jaane vaale
dil sa vahshi kabhi qaabu men na aaya yaaro
haar kar baiTh ga.e jaal bichhane vaale
din ki kajla.i hui dhuup men kya dekhte hain
shaam hote hi pareshan nazar aane vaale
jalva-e-husn saza-var-e-nazar ho na saka
kuchh nahin dekh sake aankh uThane vaale
yad-e-ayyam ke darvaze se mat jhank mujhe
aankh se duur na ho dil men samane vaale
teri qurbat men guzare hue kuchh lamhe hain
dil ko tanha.i ka ehsas dilane vaale
inhi jhonkon se hai ‘shahzad’ chamak ankhon men
yahi jhonke hain charaghon ko bujhane vaale
Leave a Reply