ab mujh ko rukhsat hona hai kuchh mera har-singhar karo
kyuun der lagati ho sakhiyo jaldi se mujhe tayyar karo
ro ro kar ankhen laal huiin tum kyuun sakhiyo behal huiin
ab doli uthne vaali hai lo aao mujh ko pyaar karo
ye kaisa anokha joda hai jo aaj mujhe pahnaya hai
main huron jaisi dulhan bani ab uttho aur didar karo
ik haar hai surkh gulabon ka ik chadar surkh gulabon ki
aur kitna ruup chadha mujh par is baat ka to iqrar karo
ik baar yahan se jaungi main laut ke phir kab aungi
tum ah-o-zari laakh karo tum minnat sau sau baar karo
haan yaad aaya is basti men kuchh diye jalae the main ne
tum un ko bujhne mat dena bas ye vaada ik baar karo
Leave a Reply