abdullah-javed

Jaanib-e-Dar Dekhna Achchha Nahin

janib-e-dar dekhna achchha nahin

raah shab bhar dekhna achchha nahin

ashiqi ki sochna to thiik hai

ashiqi kar dekhna achchha nahin

izn-e-jalva hai jhalak bhar ke liye

aankh bhar kar dekhna achchha nahin

ik tilismi shahr hai ye zindagi

pichhe mud kar dekhna achchha nahin

apne bahar dekh kar hans bol len

apne andar dekhna achchha nahin

phir nai hijrat koi darpesh hai

khvab men ghar dekhna achchha nahin

sar badan par dekhiye ‘javed’ ji

haath men sar dekhna achchha nahin

More Poems

Leave a Comment