Ab Mujhe Gulshan Se Kya Jab Zer-E-Dam Aa Hi Gaya

ab mujhe gulshan se kya jab zer-e-dam aa hi gaya

ik nasheman tha so vo bijli ke kaam aa hi gaya

sun ma.al-e-soz-e-ulfat jab ye naam aa hi gaya

sham.a aḳhir jal-bujhi parvana kaam aa hi gaya

talib-e-didar ka israr kaam aa hi gaya

samne koi ba-husn-e-intizam aa hi gaya

koshish-e-manzil se to achchhi rahi divangi

chalte-phirte un se milne ka maqam aa hi gaya

raz-e-ulfat marne vaale ne chhupaya to bahut

dam nikalte vaqt lab par un ka naam aa hi gaya

kar diya mash.hur parde men tujhe zahmat na di

aaj ko hona hamara tere kaam aa hi gaya

jab uTha saaqi to vaa.iz ki na kuchh bhi chal saki

meri qismat ki tarah gardish men jaam aa hi gaya

husn ko bhi ishq ki zid rakhni paḌti hai kabhi

tuur par muusa se milne ka payam aa hi gaya

der tak bab-e-haram par ruk ke ik majbur-e-ishq

su-e-but-ḳhana ḳhuda ka le ke naam aa hi gaya

raat bhar mangi dua un ke na jaane ki ‘qamar’

sub.h ka taara magar le kar payam aa hi gaya