havas ka rang ziyada nahin tamanna men
abhi ye mauj hai beganagi ke sahra men
samundaron men sitaron ki aag phaili hai
mahak raha hai lahu lazzat-e-nazara men
hava ne abr-e-baharan se bevafa.i ki
ḳhabar karo kisi aram-gah-e-tanha men
dilon ke band darichon se jhank kar dekho
kisi fasad ki parchha.iyan hain duniya men
fareb tha jo mujhe zo.am-e-be-karani tha
udaas hain mire sahil firaq-e-dariya men
mujhe to ek tira husn hi bahut hai magar
tire liye bhi bahut kuchh hai ḳhvab-e-farda men
Leave a Reply