Poet
ab kya gila ki ruuh ko khilne nahin diya
us ne to mujh ko ḳhaak men milne nahin diya
koshish hava ne raat bhar apni si ki magar
zanjir-e-dar ko main ne hi hilne nahin diya
ik baar us se baat to main kar ke dekh luun
itna bhi aasra mujhe dil ne nahin diya
karta vo apne aap ko kya mujh pe munkashif
us ne to mujh se bhi mujhe milne nahin diya
qaa.em nahin raha faqat apni hi baat par
apni jagah se mujh ko bhi milne nahin diya
aḳhir koi subut to ho be-gunahi ka
daman ko is ḳhayal ne silne nahin diya
‘rashid’ hava se maang ke kyuun sharmsar ho
jo tum ko ab-o-atish-o-gil ne nahin diya
Leave a Reply