Ab Kisi Ko Nahin Mera Afsos

ab kisī ko nahīñ mirā afsos

jaan kar ye bahut huā afsos

dukh nahīñ ye jahāñ muḳhālif hai

saath apne nahīñ ḳhudā afsos

laḌ ke barbād ho ga.e jab ham

saath mil kar kiyā gayā afsos

jab bhī ḳhushiyoñ ne dar pe dastak dī

sāmne aa khaḌā huā afsos

ham faqat jañg hī nahīñ haare

hausla bhī bikhar gayā afsos

ik ġhazal aur ho ga.ī ham se

sher koī nahīñ huā afsos

aap ko maiñ ne Thes pahuñchā.ī

maiñ ne behad burā kiyā afsos

ḳhūb-sūrat bahut nazar aa.e

jab mirā dil nahīñ rahā afsos

mujh ko ḳhud par yaqīñ nahīñ jānāñ

tum ne mujh par yaqīñ kiyā afsos

maiñ ne baaqī nahīñ rakhā kuchh bhī

aap ne kuchh nahīñ kiyā afsos

tū hai sharminda ilm hai lekin

tū nazar se utar gayā afsos

aadmī tū ‘sirāj’ achchhā thā

itnī jaldī guzar gayā afsos

fātiha paḌh ki phuul rakh mujh par

aa gayā hai to kuchh jatā afsos

us ne barbād kar diyā mujh ko

us ko is kā nahīñ zarā afsos

mujh ko tum par bahut bharosa thā

tum ne māyūs kar diyā afsos

ai ḳhudā hai hasīñ tirī duniyā

par mirā jī uchaT gayā afsos

Leave a Comment