ab kisi ko nahin mira afsos
jaan kar ye bahut hua afsos
dukh nahin ye jahan muḳhalif hai
saath apne nahin ḳhuda afsos
laḌ ke barbad ho ga.e jab ham
saath mil kar kiya gaya afsos
jab bhi ḳhushiyon ne dar pe dastak di
samne aa khaḌa hua afsos
ham faqat jang hi nahin haare
hausla bhi bikhar gaya afsos
ik ghazal aur ho ga.i ham se
sher koi nahin hua afsos
aap ko main ne Thes pahuncha.i
main ne behad bura kiya afsos
ḳhub-surat bahut nazar aa.e
jab mira dil nahin raha afsos
mujh ko ḳhud par yaqin nahin janan
tum ne mujh par yaqin kiya afsos
main ne baaqi nahin rakha kuchh bhi
aap ne kuchh nahin kiya afsos
tu hai sharminda ilm hai lekin
tu nazar se utar gaya afsos
aadmi tu ‘siraj’ achchha tha
itni jaldi guzar gaya afsos
fatiha paḌh ki phuul rakh mujh par
aa gaya hai to kuchh jata afsos
us ne barbad kar diya mujh ko
us ko is ka nahin zara afsos
mujh ko tum par bahut bharosa tha
tum ne mayus kar diya afsos
ai ḳhuda hai hasin tiri duniya
par mira ji uchaT gaya afsos
Leave a Reply