Osaama Ameer
jab raushni chamki to uThaya sar-e-sahil
miTTi ke pyale men tha sona sar-e-sahil
paani pe makan jaise makin aur kahin gham
kuchh aise nazar aa.i thi duniya sar-e-sahil
jab tai ho mulaqat us ashufta-sari se
tum aur hi kuchh rang pahanna sar-e-sahil
kashti men nazar aa.i thi jannat ki tajalli
patvar uThate hi main bhaga sar sahil
ab qaum utare koi siine pe hamare
pahle to utara tha sahifa sar-e-sahil
main haath baḌhata to bhala kaise baḌhata
tasvir men the saghar-o-mina sar-e-sahil
ham log karachi ke ajab log hain sahab
khana hai samundar men to piina sar-e-sahil
Leave a Reply