Ab Jo Mil Jao to Kami Na Karun

ab jo mil jaao to kamī na karūñ

shikva kaisā ki baat bhī na karūñ

kyā ḳhabar kaise naqsh ubhar aa.eñ

abhī siine meñ raushnī na karūñ

hai vafā shart un kī baat rahe

apne dil kī kahī sunī na karūñ

zikr un kā bhī chhiḌ na jaa.e kahīñ

chup rahūñ apnā zikr bhī na karūñ

zindagī hai to hai ḳhayāl un kā

ḳhair chāhūñ to yaad bhī na karūñ

un kā milnā muhāl hai lekin

apne dil se to dushmanī na karūñ

kitnī suunī hai rāh-e-zīst ‘zafar’

kyā karūñ un ko yaad hī na karūñ

Leave a Comment