Sufi

Ab Agar Ishq Ke Aasar Nahin Badlenge

ab agar ishq ke asar nahin badlenge

ham bhi pairaya-e-iz.har nahin badlenge

raste khud hi badal jaaen to badlen varna

chalne vaale kabhi raftar nahin badlenge

duur tak hai vahi aaseb ka pahra ab bhi

kya mire shahr ke atvar nahin badlenge

main samajhta huun sitare jo sahar se pahle

bujhne vaale hain shab-e-tar nahin badlenge

gul badal jaenge jab mausam-e-gul bichhdega

jab khizan jaegi to khaar nahin badlenge

log badlenge mafahim musalsal ‘aghaz’

aur ye sach hai mire ashar nahin badlenge

More Poems

Leave a Comment